茶餐廳手記（#817）趁有錢的時候執笠

　　今日早上去到茶餐廳，有客人話生意難做，每個月都蝕多少，又睇唔到前景，打算執咗盤生意，早日享受退休坐活。

　　老闆話如果真係冇得做，早日執咗佢好過，不過，最緊要是按勞工法例賠償俾員工，千祈唔好問大耳窿借錢繼續做落去，現在做生意，有得做就有得做，冇得做就冇得做，千祈唔好懷緬昔日風光，當時生意是做唔切，在茶餐廳經常都聽到有客人問人借錢來維持盤生意，但最後不但欠落一身債，而且仲欠員工賠償，跳樓都唔掂，到那時候，那些人就會話早知當日趁有錢的時候執笠，現在就唔使咁煩。

　　老闆問我，現在賣樓，尤其是蝕本賣樓，有沒有壓力，老實說，壓力大到不得了，做生意唔會每一次都賺，買股票買樓亦唔會次次都贏，做錯決定，蝕本賣股票賣樓絕對不出奇，但一定要自己賣，唔好俾銀行沒收物業變成銀主盤之後由銀行賣，因為由銀行賣，一定唔會賣得好價錢，並不是銀行壓價，而是買家知道，業主冇話語權，唔壓價就笨，不過，自己賣樓是有兩個條件，一是準時還款，二是資不但抵債，而且仲有相當水位，雖然有人話可以將物業問其他財務機構借多兩成，夠捱一段時間，短時間是冇問題，長時間是反而會泥足深陷，好似一盤蝕本生意，勉強捱落去，最後仲欠更多錢，更難解決問題，現在做生意以及做業主都係咁困難，有問題早日了結比較好。