茶餐廳手記（#764）現在買樓的人隨時由用家變炒家

　　星期一早上去到茶餐廳，有客人話週末去睇二手樓，打算幫子女買樓，講都冇人信，每一個樓盤都有很多人參觀，內地人同香港人都有，他們有一個共通點，就是如果有十幾個%賺，摸返一轉都冇問題，而事實上近日有不少賺錢摸貨成交，與蝕本的大約九比一，但奇怪點解中原指數不斷下跌，上星期仲跌超過1%咁多。

　　老闆話，現在買樓的人無論是內地人或者香港人，大多數是用家，但唔知點解，瘦田冇人耕，耕開有人爭，買入之後代理不斷話有人畀錢買家賺，由最初的5至7個%到十幾個%，買家見到有錢賺，而且問銀行借錢又咁麻煩，最後都經唔起代理遊說，將剛買入的單位賣走，身份亦由用家變炒家，而炒樓的第一個條件，就是樓價有很大水位，如果冇水位，就算幾叻都做唔到炒家。

　　做炒家一定要遵守一個戒條，如果冇人買可以上會就上會，千祈唔好諗住減價出售，因為只會俾新買家鋤價，隨時損失所有訂金，反之在上會之後，隨時會有人俾錢佢賺，甚至會賺好多。

　　當市場上有炒家，樓市很快就會止跌回升，因為炒家見有錢賺，有可能將剛買入的單位賣走，短期內市場反彈十幾%絕不出奇，但如果冇炒家，或者好似以前咁樣受辣招所限，炒家絕跡市場，以低價出售的單位就冇咁容易賣出，樓價就算唔跌，都只能夠在低位維持一段時間，不會止跌回升，當市場出現炒家，就是樓市反彈訊號，不得不小心，千祈唔好咁容易賣走自住單位。