地產行業中最蠢的人

　　有老友問我：「現在買樓是不是很蠢？」當然不是，唔買才蠢，唔止蠢，仲會被人笑。有學者笑那些在過去幾年賣了樓的人，話他們落錯車。其實，上車落車就好似日出日落，各人有各人需要，錯唔錯就很難講，現在當然是錯到唔恨，就算唔安慰幾句都唔好話人錯落車。這句話令人感覺到很凉薄，尤其是講這句話的學者在三四年前大聲疾呼叫人唔好買樓，話市場上有大約20萬空置單位。只要政府出招迫炒家賣樓，樓市必定會下跌。最新數字只有5萬個空置單位，已經是近年最高。當日學者以市場上有大量空置單位為理由叫人唔好買樓，令到落了車的人不敢再上車。今日笑人落錯車，我話凉薄真的是沒有講錯。

　　有評論員話樓市會不斷上升，睇淡樓市的人一世都要租樓住，意思是樓市的前景是非常好。而另一位更揚言樓市在未來18個月上升30%，理論上現在唔買樓的人是最蠢。如果這理論是正確，賣樓的人更加蠢。即使如此，他還不是地產行業中最蠢的人，最蠢的應該是地產商。他們明知道樓市會上升，甚至在18月內上升30%。點解不但借錢俾人買自己的新樓？仲提供高回贈來吸引買家，搞到政府叫他們自律。事實證明，地產商的確是地產行業中最蠢的人。不過，大家又是否同意。