大約在兩個星期前，東瀛遊禤先生請晚飯，講起他會親自帶一團，還有一個位，剛好我有一些空閒時間，所以就立刻成行，在出發前一晚我要請客，被請的都是猛人，當然包括禤先生在內，大家都經常聽到輸人不輸陣，究竟請客要佈一個什麼陣，很多人會認為要佈一個鮑參翅肚，或者燕翅鮑陣，西化一點就佈一個米子蓮陣，應該
沒有錯，但在我們這班朋友，美食是其次，美酒才是主角，要佈陣一定要佈一個酒陣，三枝教皇白酒，六枝82年法國紅酒，一枝25年Highland Park ，我心想一定夠，原來唔夠，酒陣被攻陷。
今次禤先生親自帶隊，主題是美食，在出發前在候機室有團友問我米子蓮三粒星是如何定位，照米子蓮官方定義，一粒星是順道前往，兩粒星是繞道前往，三粒星是專程前往，而我對三粒星有不同見解，一粒星是隨時可以食，兩粒星是唔趕時間可以去食，三粒星是唔肚餓的時候才可以去食，理由很簡單，因為一粒星的大多數是收費比較大眾化的小館，唔需要慳住荷包可以隨時去食，兩粒星的大多數是宴會料理，要用很長時間去欣賞，如果趕時間就唔好去食，三粒星就大件事，除了有兩粒星的特質之外，仲係要食唔飽，在香港米子蓮三星外國大厨，他們都聽得懂三個字，就是雲吞麵，有米子蓮三星大厨曾經對我說，食唔飽是他們的策略，因為肚餓才會覺得好食，似乎又有多少道理。
