今早約了老朋友去飲早茶，見面之後老友問我昨晚有冇瞓覺，今早已經出完文同埋跑完步，我話昨晚瞓得不好，因為有朋自遠方來，但帶來一個不好的訊息，令我直覺上覺得多倫多樓市會爆煲，老實說，多倫多學者就很多，了解樓市的人不多，爆煲是很快會出現，我要趕快寫幾篇關於多倫多樓市會不會爆煲的文章，學老友汪敦敬話救得一個得一個，其實，救人不是我的責任，我只不過是寫評論樓市文章。
老友送隻鑊俾我，我問是不是送給我揹，自從「細價樓爆煲論」之後，我已經揹了很多大鑊，老友話這是一隻鐵鑄鑊，細細隻，用嚟煎蛋一流，佢同佢老婆已經開了鑊，我返屋企就可以用，我話需唔需要咁坦白，兩公婆開鑊都話俾我知，不過，我知道老友點解送隻鐡鑄鑊給我，因為最近世界衛生組織話大家毋須顧慮膽固醇，可以放心食雞蛋，我相信膽固醇冇問題，類固醇就一定有，老友又問，香港樓市會不會爆煲，
我大言不慚話，如果冇爆煲論，香港樓市是有很大機會爆煲，因爲財務公司二按好似類固醇，令樓市非常亢奮，就算是現在，地產商提供高成數按揭，就好似替新樓打了類固醇針，出現極度亢奮狀態，令到不少專家轉軚，聽聞金管局已經出招，五月後任何財務機構為買新樓的人提供高成數按揭，首先要做壓力測試，所以，5．1黃金檔期的新樓銷售只得七十多個單位，比去年大跌七成，同時，是過去四年最低數字，由此可見，金管局唔俾樓市打類固醇，樓市便好似花兒一樣，謝了。
