現在買新樓，要面對地產商的各種優惠，有多少手足無措，即使如此，新樓的去貨量亦未如理想，今年已推售的新樓盤，銷售量不足四成，但市場上的購買力仍然不俗，點解新樓銷情不佳，歸根究底原因只得一個，就是太多新樓盤供應，買樓的人有太多選擇，他們反而唔敢落手買樓，恐怕在買樓之後，地產商就算唔減價，但都會增加優惠，現在最好靜觀其變。
在去年同期，樓價屢創新高，新樓盤銷情不俗，一Q清袋亦出現過幾次，主要原因是市民擔心土地供應不足，導致樓價繼續飆升，雖然，不同財金官員在不同場合表示，在未來三至四年有高達九萬二千個單位供應，但被市民質疑是假大空，政府是很難做到承諾，供應不足將會是樓市長遠問題，結果就是樓價飆升，當時，連一些位置不佳的新樓單位亦可以快速去貨，主要因為買家沒有選擇，到今日，買家不但有得揀，而且可以慢慢揀，新樓去貨反而不及去年，要樓價止跌回穩，地產商一定要有秩序推銷新樓盤，否則，一窩蜂推出市場，市民有太多選擇，他們反而唔敢買樓。
話雖如此，我相信現階段是很難做到，香港經濟轉壞，供應增多，政府不但沒有一套挽救經濟方案，又唔肯撤辣，或者放寬逆週期措施，供應亦不肯減少，在這情況下，真的是執輸行頭，慘過敗家，地產商今日唔賣樓，明日將會面對更多競爭對手，買家將會有更多選擇，不過，他們反而更難做決定買樓，這是人性使然，大家千祈唔好覺得奇怪。
