中國政府毋需在高位救市

　　中國政府高調宣傳救市，仲講明Sky is the limit，咁樣做，一定救到市，不過，中國政府就遍體鱗傷，揸住一手高價貨。外資行，證券商，甚至個別高風險投資者就得米，雖然中國政府有大量儲備，輸多少都唔怕，當收買人心，但很可惜，人心不足蛇吞象，今次救市，股民未受到教訓，唔識驚，唔使幾耐又繼續狂買股票，如果再有下次，唔救都唔得，我認為中國政府就算要救市，都要救得其所，最好就是政府可以從中得到龐大利潤，就這點來看，香港政府比較優勝，香港亦曾經救市，但救市之後，所得的利潤仲可以設立一個盈富基金，但很可惜，救虎三雄中，有兩個識得救市唔識得救自己。任總又已經退休，中國政府想問人都沒有門路，唯有自己揣測。我覺得現在救得不倫不類，唔救好過救，現在騎上虎背，唔救又唔得，中國政府今次真的很頭痕。
 
　　國內A股市場在不久前曾大幅飆升，這意味著有不少人獲利不菲，現在雖然回落，但仍未到起步點，所以，我認為中國政府救市是事在必行，不過，救得太早，就算救到，都是益了那些炒股的人。如果中國政府遲D先救市，就大大不同，反而有更多人多謝中國政府，雖然有很多炒股票的人頭崩額裂，但炒得股票，就要預風險，行船跑馬都有三分險，更何況炒股。

　　其實，任何股票市場都有自救能力，昨日港股曾經跌超過一千點，有很多不是在股票市場搵食的人都會心思思買多少股票，所以，股市又會反彈，但若果市況繼續轉壞，再下跌多兩、三千點，今日買股票的人當然是輸了，但又會有另外一批人買股票，這是股票市場的自救能力，但如果香港政府見股票下跌立刻救市，即是將股票市場的自救能力廢除，久而久之，每一個人都放膽投資股票，因為他們知道倘若股市下跌，政府便會立刻救市，但這種救市方法，就算有幾強大的儲備，都唔救得幾多次，總有彈盡糧絕的一日，而且仲會俾人批評為粗暴救市。所以，政府應該保留彈藥，等股市跌到殘，人心虛弱，自救能力失效時才出手，這樣做不但事半功倍，而且會為政府帶來一筆儲備，這亦是當年政府打虎做法，如果當時太早出手，勝方有可能是過江大鱷，我講大家或者會唔信，太早救市，不但會削弱自己能力，而且會增加對方本錢，但很難揸得準。講股票，我自認門外漢，以上可能全是廢話。