引刀成一快，莫負少年頭

　　有老友問我，咁多網友的名字，最喜歡是哪一位，在我未講出答案之前，條友立刻話一定是雲在天邊水在瓶，我話唔係，雲兄係高人，佢睇投資地產的人是凡夫俗子，投資股票方為真英雄，不過，現時在國內，真英雄是要國家打救，對雲兄來說，有點不是味兒。條友又話，唔通係引刀一快，所以達爾文話，物以類聚，人以群分，我啲老友真的是有料，我平時响佢哋身邊學埋學埋，都已經夠响網站也文也武，但很可惜，我老友話我唔識歷史，引刀一快是大漢奸汪精衛在臨死前講，引刀成一快，莫負少年頭，條友講完之後好得戚咁行咗去，都唔聽我解釋。

　　至於汪精衛是否是大漢奸，我問過很多人，冇人話唔係，我又問他們，國父遺囑係邊個寫，冇人肯答，是汪精衛，當其時蔣介石亦在旁，又唔見佢寫。汪精衛在上海被日本仔封為偽總理，大家話佢係漢奸，但點解日本仔又能夠攻入上海，當時有國民黨十九路軍守上海，但蔣介石話要保存實力，叫十九路軍撤出上海，軍長抗命，仍然死守上海，除徐家匯戰外，八百壯士死守四行倉庫，但蔣介石斷糧斷水，十九路軍唯有撤出上海。日本仔進入上海後，準備大屠殺，汪精衛死諫，終於接受做偽總理，其後南京就沒有出現大漢奸，結局我唔想講。

　　網友引刀一快曾經說在2014年底，中原指數低於118點，當然，引刀一快是輸了，不過他有認輸，沒有逃避，沒有隱姓埋名，有沒有多用一個網名我就唔知，老實說，在網站，若果不是用真姓名，都是口講口賠，毋需太認真，我的「細價樓爆煲論」都九成九會輸，但我只聽到別人講我敢言，老實說，在這風高浪急的的細價樓巿場，叫我講細價樓還有上升空間，我講唔出。林一鳴就威水，但大家如果知道林一鳴最近發表的文章就笑唔出，林兄講香港股市將會進入熊市，他列出四個理由，其中一個是香港將會變成中國二線城市，既然林兄有此見解，我真的不明白細價樓點解還可以上升。

　　昨日我用曾國藩屢敗屢戰來講A股，但唔知點解，有網友又講百頁簾效應，認為樓價一定上升，我本來唔想駁，但費事大家學壞師，事情很簡單，大家去拉百頁簾上升是很費力，亦要很小心，稍一不慎，齒輪未能卡住，百頁簾就會sir一聲落下，樓市，股市亦一樣，上升時很費力，大家亦應該小心，否則，sir一聲一切就會化為烏有，大家學嘢，自己都要消化，千祈唔好人云亦云，連百頁簾怎樣操作都唔知就講開口埋口講百頁簾效應。