亞視，投資者的哀歌

　　任何一位做過亞視投資者，都會有兩種心情，開始時就覺得“前程錦繡”，擁有一間電視台，的確是非同凡響，以往的投資者蝕本，只是他們的智慧不夠，財力不足，但後來他們就以“笨笨”來形容自己。我夠膽講一句，無人識做亞視，除了邱德根，所以，亞洲電視應該叫亞邱電視比較貼切。
 
　　投資行裡有句說話，有智慧不如趁勢，趁勢更加要量力而為，投資亞洲，唔好講趁勢，根本就是同個天作對，有咁多嘢唔好投資，走去投資亞視，亞視的最大資產是人才， 但可惜，那些資產是不固定，要養住他們亦不容易，買一個物業，向銀行申請貸款，如果無錢供，同銀行傾下計，講下數，遲兩，三個月再供也沒有問題，但搞電視，無糧出立刻變成大新聞，其他電視台不但爭相報導，而且詳盡非常，試想想，那些亞視大股東是否行唔安，坐唔落，老實說，他們又不是無錢，不過唔想將錢掉入深淵。本來，那些投資亞視的人都是為了出名，又順便可以親近那些姐仔，誰不知出錢以後，見到那些所謂姐仔，若果仲有碩果僅存的話，廿年前已經唔係，投資的金錢，已經晤見咗一半，那些股東見到朋友投資友台如此風光，頗有「人到洛陽花似錦，我到洛陽⋯⋯」的心情，大家可想而知。
 
　　人說，能夠賣貨尾的人就是好經紀，以往我同意，但現在我認為能夠叫人買亞視的人才是最好經紀，我很想知道其中過程，當中一定引人入勝，哈佛大學教科書的商業個案亦不外如此。我想，以往買亞視的人，一定是每年付出相當大廣告費，買亞視可以做到河水不流別人田，但買了亞視後才知道，接近零的收視率，又點會對商品有幫助。
 
　　亞視仍然存在的一個節目叫把酒當歌，我相信是來自曹操的“對酒當歌, 人生幾何? 譬如朝露, 去日苦多”，都已經唔係幾利是，誰不知，還未算，最後還出現“繞樹三匝，無枝可依”。當時有謀臣話：「丞相，唔係幾好。」曹操火滾，一貫作風，斬鬼咗佢。後來，赤壁遇周郎，華容逄關羽，原來真的是無枝可依。
 
　　有消息話有十多組人傾緊亞視，我相信，最大機會買亞視的人就是亞視的股東，不過，怎樣都好，最緊要出糧俾職員。其實，我最佩服葉家寶，在這關頭仍然緊守工作崗位，唔知道誰是老闆的工作崗位，叫我都唔會做。葉生，服了你。