10月開始，如無意外美國將會停QE。
人類史上最大規模嘅貨幣系統實驗將正式進入第二階段。就係呢個時候，彭博大宗商品指數破五年低位，粟米、黃豆、小麥、大豆油全部破近四、五年底。冇嘢比呢個現象更具象徵意義，因為五年前係QE時代之濫觴，所有人都信奉印銀紙應該令一切越來越貴，但五年過去，大宗商品破底，歐洲徘徊通縮邊緣。如果印銀紙可以解決一切，昔日羅馬帝國唔會滅亡，國民黨唔會敗走台灣，津巴布韋應該係一流強國。

鑄幣稅搶錢

要明白印銀紙帶嚟嘅問題要先明白鑄幣稅概念。舊時用硬通貨時代，皇帝發覺唔夠錢使就將錢偷偷回收，熔咗佢溝入其他平價雜質，得到嘅金或銀自己落格，呢個就係鑄幣稅。
又或者發行大面額貨幣嚟填數。三國時期劉備入川發覺唔夠錢使，劉巴醒條橋畀佢，就係鑄「直百錢」，意思係一個直百錢頂得上漢代一百個五銖錢。結果幾個月過去，劉備政權府庫充實。
無論係溝淡貨幣嘅含金量定用大面額貨幣搞通脹，效果都係一個，就係掠奪百姓嘅民脂民膏。共產黨老祖列寧一早看透世事，連當今貨幣系統奠基人之一凱恩斯都要引用列寧一番話：「顛覆資本主義制度最好嘅辦法就係令貨幣貶值，通過連續嘅通貨膨脹，政府可以靜靜雞咁沒收百姓嘅財富，加劇貧富懸殊……一百萬個人入面亦唔見得有一個人睇到蠱惑所在。」
但隨住時代進步，平民百姓已經醒水，當聽到政府要印錢嘅時候，第一時間衝去擁抱實物同資產。大戶知道政府玩乜所以湧去買國債，平民見勢色唔對亦湧去買樓。
同樣係10月，歐洲好大機會開始歐洲版QE。有一種睇法認為，美國QE完後歐洲QE，歐洲QE完另一個大國QE，透過接龍嘅方法走數並逃避歷史嘅循環。
天下間有冇咁筍嘅事？（待續）

執筆之時，紐約棉花破五年底，每磅61.4美分，幾乎跌返去QE前價格。睇住棉花口價係咁碌，耶倫𠵱家最擔心嘅相信係，如果QE退場同加息會影響資產價，呢幾年就白做。
事實上，伯南克就曾經中伏。2008年10月聯儲局推出超額存款準備金利率（Interest Rate on Excess Reserves，IOER），旨在QE時控制市場上嘅游資，聯儲局自己都驚印錢太多會搞出惡性通脹。IOER顧名思義即係銀行將多餘嘅錢泊係央行戶口時所得嘅利息，調高等同收緊銀根。
伯南克當時以為有計，出一招可以有兩個效果。事關IOER理論上亦會等同市場短期拆借息口下限，因為當存錢入央行都有0.25厘又冇乜風險時，銀行梗係唔肯用平過呢口價借錢出街。但事實證明伯南克中伏，聯邦基金有效利率一直係IOER之下，所謂下限變左封頂。

耶倫大玩凌波微步

點解會咁？伯南克計漏一條數。
QE係聯儲局買債，畀錢持債者。幾年過去，各大銀行同金融機構都錢太多，有錢冇碇使就泊係央行收息，結果單係呢筆錢已經有2.7萬億美元。
但呢個着數要銀行先有，非存款機構如兩房、Money Market Fund等唔可以咁樣賺息，就會將QE所得到嘅錢以低過IOER口價借出街，結果令現實嘅息口比IOER為低。講白啲，就係聯儲局息口睇場個位畀人搶咗去。
咁梗係唔得，聯邦基金利率分為目標利率同有效利率，目標利率指聯儲局希望達到嘅息口，有效利率指市場上實際行緊咩息口。過去聯儲局會用各種公開市場操作去調控息口，如果話聯儲局做完都控制唔到，咁好大鑊，所以明年開始耶倫會兩招一齊出。
第一係IOER。既然現實上IOER已變成市場上短期拆借息口嘅頂，不如順水進舟，就將其作為封頂，估計稍後聯儲局會將聯邦基金利率區間上限訂為同IOER一樣。
第二係ON RRP。隔夜逆回購（Overnight Reverse Repurchase Agreement，ON RRP）簡單嚟講即係將QE調轉做，只不過時期短同規模細。逆回購意思係聯儲局畀債金融機構，金融機構借錢畀聯儲局，到期後再交換。美國逆回購係收水而內地逆回購係放水，因為兩者角度唔同，美國從銀行角度睇，內地從央行角度睇。
由於回購協議要抵押品，而抵押品美國國債被視為無風險，所以逆回購嘅息口等同最低拆借利率，ON RRP打出嗰口息會成為benchmark，作為聯邦基金利率下限，即墊底。
可以見到，耶倫其實喺到玩緊凌波微步。曹植《洛神賦》寫伏妃「凌波微步，羅襪生塵」，「凌」即「係上面」意思，伏妃係水波上面慢慢行，靚襪下面泛起漣漪好似揚起塵咁。IOER同ON RRP一頂一底鎖價，加息步伐飄住嚟咁微步而行，水波不興，衝擊就細。
美國退市同加息慎之又慎，其實反映心中無底，自己對所謂經濟復蘇都冇十分把握，怕稍有失誤就陷入二次衰退。其他國家唔係儍，過去幾十年硬食美國鑄幣稅，見你𠵱家關鍵時刻，當然係搶灘最好時候，中國就將部署多年嘅人民幣國際化在呢段時期搶攻。

美國有凌波微步，中國都有乾坤大挪移。（待續）

夏慤道發出催淚彈第二日，中國外匯交易中心宣佈人民幣兌歐元喺銀行間外匯市場可以直接交易。
人民幣要國際化，香港嘅角色非常重要而且係首位，因為人民幣唔可以自由兌換。外匯進入中國後要交畀央行，機構可以自己留部份，叫做「外匯留成」，一般可保留25至30%，部份如軍工部門可以留100%。
冇上繳嘅外匯喺金融機構之間流傳，就叫銀行間外匯市場，中間要經過中國外匯交易中心交割。所以呢個係一個在岸市場，如果在岸嘅歐元唔夠多，實際作用就唔大，定價或會因為交投太少而同國際牌價有差距。2014年上半年全球人民幣兌歐元交易額係1,104億元人民幣，兌美元則達到12.2萬億元人民幣，估計歐元在岸交投量唔會大。
近年人民幣國際化嘅步伐越來越快，點解咁急？

香港角色重中之重

一隻貨幣算唔算可自由兌換，《國際貨幣基金協定》有規定，港紙係其中一隻可自由兌換貨幣。於是出現一種情況，人民幣喺國際間唔可以自由兌換，但用嚟兌港紙香港要硬食，所以只要經過香港，人民幣可以去到全世界。
喺咁樣嘅情況之下，香港嘅GDP雖然佔全國比例不斷下降，但對中國而言仍係重中之重。除咗呢樣，以下根據國際清算銀行、金管局、貿發局、路透社、《華爾街日報》等等簡單歸納幾點：
‧2013年香港吸納直接外來投資770億美元，全世界排第四（美國1,240億美元、中國1,240億美元、俄羅斯790億美元）。
‧香港係中國最大嘅海外直接投資來源地，截至2013年底，來自香港嘅實際利用外資總額為6,646億美元，佔全國的47.7%。
‧香港係中國最重要離岸集資中心，截至2013年底，797間內地企業喺香港上市，總市值1.8萬億美元，佔市場總值56.9%。
‧由1993年起，內地企業喺香港發行股票集資超過4,000億美元。
‧香港係僅次於倫敦同紐約嘅全球第三大金融中心。
‧香港係世界第五大外匯交易中心同最大人民幣離岸交易中心，人民幣每日交易量近500億美元，支付量佔全球72%。
‧香港銀行對中國貸款總額2.87萬億港元。
‧2013年，香港發行嘅人民幣計價債券達1,170億元人民幣。
‧香港係中國最重要嘅轉口港，2013年，香港62%轉口貨物原產地係中國，55%目的地係中國。
‧2013年，香港貿易總值9,770億美元，相當於全球貿易總值18.8萬億美元嘅5.2%。
‧香港法律同稅制建全，3,700間海外公司嘅大中華地區總部喺香港。
‧2014上半年，投資銀行喺香港獲得近5億美元佣金，相當於喺新加坡、韓國同馬來西亞同期獲得佣金嘅兩倍。
從客觀數據可以見到香港對中國非常重要，而且中長期內都冇可能搵到另一個地方代替。中國面對最大嘅問題，係美元正在轉強，而中國經濟卻走緊下坡。在〈美國會加幾厘息〉*一文內提過，美國加息幅度唔會多過6厘，所以真正威脅唔係加息，而係美元強勢。人民幣國際化時美元轉強，如果人民幣唔能夠保持強勢，外資就好容易流出中國，香港喺呢個時候就顯得更加重要。除非中國準備鎖國或權力鬥爭引發其他問題，否則香港唔可能出現如六四鎮壓。