當日大埔白石地皮流標，再招標的時候比流標價還要平，鷹君冷手執個熱煎堆，當時我指出，政府若果有類似的土地再招標，地價一定唔會平，因為入標的財團恐怕以執死雞價落標，但政府又唔流標，反而被其他財團執死雞，所以，天水圍兩幅地能夠以高於市價賣出，又令很多樓評家跌破了眼鏡，因為在招標前，大多數專家都是估平均呎價低於1,400元，但新地以1,800元奪得，唔通新地出錯價，當然唔會，只不過新地唔希望被人執死雞，所以，只要唔流標 ，下一次招標又變回市價，是不是有多少禪的味道，我自己都覺得有，希望大家能夠意會。
昨日見到雷霆，首先恭喜，不過，大家就沒有談及天水圍兩幅地，話晒都是商業秘密，這點，最高級行政人員一定知道箇中道理，有些沒有口德的人會說，你買到梗係你俾最多錢，即是最貴，但一般生意人都只會祝賀對方，就好似世界盃一樣，就算巴西輸到七個一皮，史高拉利一樣祝賀路維，唔祝賀，會俾人話小氣，這亦是應有的風度。
今次新地連奪兩幅地皮，報章說新界地價止跌回升，但新界土地跌價是政府一手一腳做成，一方面賣地，另一方面又要出招壓樓價，地價又點會好，政府見地產商出手低莊，索性將土地收回不賣，原來中正大地產商下懷，政府唔賣地仲好，CY所說的目標又如何能夠達到，沒有供應，即是焗樓價飆升，地產商手上的樓盤又可以賺大錢，政府見供應減少，樓價飆升，唯有拿拿淋賣地，幾平都賣，到那時候，我唔知道地產商開心程度去到邊，可以以平價買地，高價賣樓。我不知道今次政府官員是否受到高人指點，或者覺今是而昨非，在大埔白石地皮招標，竟然接受鷹君低標，如此一來，政府即是向所有落標的地產商宣佈，政府決意賣地，價高者得，決不收回，於是，大家都唔敢低價落標，恐防給其他地產商以稍高於他們所出的低價奪得，於是，新地以高於預測價出手，但我估計，其他地產商的出價亦不會低，很多評論員覺得很意外，不如今晚在夜瀾人靜的時候，反覆細心想想，甚至以地產商的角度思考，好大機會得悉箇中原因，否則，你就會說，政府肯平賣地，點解地價唔會平。
