解決財赤，先開源，後節流

　　財爺話今年財赤，有機會達到千億，比預期四百幾億多出一倍，有人立刻話政府應該慳住嚟使，從公務員開始節流，所有公務員減薪10 ％，愈高級減得愈多，老實說，我心裡是贊成，但是如果咁樣做，一定打擊公務員士氣，而且唔符合做生意原則，做生意是先開源，後節流。

　　老實說，千億財赤，真係唔使驚，如果地產商買地，財赤問題很快可以解決，所以，首先是吸引地產商勾地，如果任何一個地產商勾出一塊土地，最後拍唔到，政府應該俾1%佣金給那個勾得土地的地產商，我講出嚟一定會有很多人反對，他們一定會話政府攞土地出嚟，地產商勾地，點解要俾佣金，唔俾當然可以，但是沒有地產商勾地，土地賣唔出，政府又如何解決千億財赤，俗語話，小財不出，大財不入，唔開源又點會有收入，如果地產商願意買地，千億財赤可以輕鬆解決。

　　除了賣地之外，港股印花稅收入是很重要，在以往， 港交所對上市公司的要求非常嚴謹，導致有資格上市的公司，只有5%可以上到市，上唔到市的公司就會去其他國家上市，最熱門就是印尼，去年印尼IPO成績好過香港，所以，港交所亦應該開源，讓更多合資格的公司可以在重香港上市，如果多咗公司在香港上市，港股成交金額一定大增，去年港股成交金額每日平均大約千億，已經可以為庫房帶來五百億收入，如果港股每日平均成交金額超過千五億，再額外為庫房貢獻五百億，財赤問題已經不是問題，點解要搞到公務員減薪咁失禮。