在樓市當旺的時候，做物業投資很容易搵錢，不少搵到錢炒家不是嫌搵唔夠，而是話冇時間去使，所以，他們都唔鍾意返屋企，甚至視屋企為地獄，不過時移世易，在樓市轉靜，唔係咁容易買樓的時候，炒家經常要返去被他們視為地獄的屋企，甚至要破·地獄。
近日我見到有很多靚住宅出售，業主是資深物業投資者，那些住宅以前被投資者戲言是地獄，今日要賣走，
都算是破·地獄，通常如果是物業投資者自用或者自住單位，質素都非常好，因為他們經常接觸優質物業，在汰弱留強後，最優質的才留俾自己，今日連最優質的都要賣走，可以說是相當迫切，但並不是說他們的財政有問題，資產負債比率太高，只不過是現金流不符合銀行要求，唯有將手上最優質的物業賣走，當中包括自住或者自用物業。
有投資者問，可不可以效法目連救母，在新買家手上搶返自己個物業，其實都唔係唔得，不過就比較麻煩，首先要買家配合，賣樓只是一個形式，售價要低於市價，投資者可以在兩三年內以既定的溢價買返，而在這段時間，投資者是售後租回，租金一定是很高，到期如果投資者唔買返，合約便作廢，投資者可以在這段時間出售其他物業，籌足資金買回自己的優質物業，如果做得到都可以說是現代版目連救母，我聽過有人成功，亦有人失敗，不少投資者手上的優質物業都是這樣買返嚟，現在只是易地而處而已。
