我最初買樓，唔係好辛苦儲到首期，不過就供得好辛苦，但總算托賴，供款從未試過脫期，甚至連通知銀行可否寬限幾日都未試過，因為我知道，如果請銀行俾幾日寬限，那是話俾銀行知我冇錢供樓，銀行就會發揮好天遮本色，未至於要我立刻還錢，但就會睇緊我的戶口，遲一日都唔得。
即使如期供款都未能倖免於難，以前銀行很流行叫客戶清還多少貸款，美其名叫做壓力測試，我當時不知道，當接到銀行的追數信真係嚇到標尿，當時首期一成，銀行的壓力測試也是一成。老實說，如果唔問人借，邊度可以過到銀行的壓力測試。
我問貸款俾我的銀行職員，佢話壓力測試是內部同事要求，他們已經極力反對，並且將全額降低一半，如果我還唔到有可能要全數清，我聽到都出一身冷汗。
我明白不用負責的人才會要求客戶做壓力測試，如果有客戶出問題，他們會邀功話壓力測試可以找出不良客戶，如果全部都冇問題，他們也可以邀功話壓力測試顯示銀行放貸非常謹慎，風險系數非常低。
商場也是一樣，如果傾一單交易，對手是久經戰陣，成事的機會比較大，如果有人押陣，尤其是老闆親信，大多數是傾唔掂，押陣的人會要求多多，因為贏了是他的功勞，傾唔掂就是負責傾的同事負責。
