今晚有堂食，老友安排了慶功宴，原來老友在年初時打算匯一筆錢去日本交樓款，但銀行經理話可以等一陣，日元有機會跌125:1美元，老友見還未到要交款最後限期，所以沒有匯款到日本，昨日老友在128:1美元的時候買了日元，大大話話慳了接近10%。如果當時匯了款，真係喊都無謂。
我認為老友做得非常正確，錢是不可以賺到盡，雖然有不少專家話日元可能跌到135:1美元，但如果有需要的話，包括那些準備在開關之後去日本購物的香港人，可以考慮換定日元。雖然日元有可能下跌至135:1美元甚至更低，但亦有可能調頭回升，去日本購物，使的是開心錢。千祈唔好因為日元調頭回升而令到自己唔開心。
很多人不明白，點解日元跌得咁急咁勁，撇開所有政治經濟因素，我認為日元下跌是預先張揚的結果，無論是日本政府抑或國際金融家、資深評論員都認為日元會下跌，令到有很多打算買日元的人會睇定一些，因為一不小心就會輸10%匯水，數目是很龐大。
另外，那些要買外幣的日本公司就會加速賣走手上日元，否則日元下跌，他們就要用更多日元買外幣，有了這兩個因素，日元下跌是很正常，而結果顯示，日元又真的下跌，令到睇淡日元的人更有信心。不過，日本政府一向有一個做法，就是當日元跌至某個位置就會支持，我唔敢俾意見，但如果有需要用日元的話，可以考慮在現階段買日元，就算輸都唔會輸得太多。
