特首選戰之落霞與孤騖齊飛

　　冼師傅突然宣布參選特首，估計很難得到188張選委票，應該連參選的資格也沒有。冼師傅這樣做應該是為了提高個人知名度，日後在咭片上甚至可以印上「準特首參選人」。好似曾經報名參選港姐的靚女一樣，即使連20名都不入，又冇得出鏡，但仍然可以同人講是準港姐候選人，不是港姐準候選人，兩者是有分別，千祈唔好搞錯。

　　老友問林鄭如果參選，得勝的機會率有幾多，我話落霞與孤鶩齊飛，老友唔明白，問點解唔係鳳閣恩仇未了情，而是落霞與孤鶩齊飛，我話聽古千祈唔好駁古，否則冇古仔聽。

　　大家都應該知道落霞與孤鶩齊飛出自王勃「滕王閣序」，當日，王勃雲遊四海，去到江西南昌，洪州都督閻伯嶼重修滕王閣完畢，於閣上大宴賓客，初唐四傑之一王勃亦在受邀之列，席間受邀為滕王閣寫序，王勃亦勉強為之。

　　而事實上王勃恃才傲物，根本睇唔起參加宴會的賓客，在寫滕王閣初段亦提不起勁，所寫的亦平平無奇，其他賓客有見及此，在席間猜枚行酒令，嘈喧巴閉，王勃突然間寫下「落霞與孤鶩齊飛，秋水共長天一色」，所有賓客拍爛手掌，王勃餘興未盡，一口氣寫下不朽名作「滕王閣序」，一般人認為這兩句是形容意境，簡直是無懈可擊，其實，王勃是有其他意思。

　　老友話，就算我作的故事是真的，這與選舉有什麼關係。後來有客人發覺，王勃自比孤鶩，其他賓客都是落霞，只是陪襯而已。今次特首選舉，如果沒有一些有份量人士參選，以現時格局，林鄭是孤鶩，其他只是落霞而已。