有評論員同我講，若果唔係我在股樓市預測，話恆指今年會升至兩萬八點，佢一定會入市，而且仲叫他的信徒入市，但我講升，他一定講跌，仲話恆指兩萬點不保，今次唔知點樣同信徒交代。
我是很佩服那些評論員，他們一定有辦法交代，而且仲會好好睇睇，根本不用替他們擔心，而事實上不少評論員睇淡今年股市，大家可能唔相信，太多人睇淡反而是一個入市訊號，這是非常微妙，睇淡的意思代表他們準備入市，就算在二萬點才入市，一輪沖鋒之後，又會升返上去兩萬四，兩萬五點，這些事經常發生，大家不用大驚小怪。
反過來說，如果股市下跌，那些專業評論員話唔使驚，只是假跌，很快就會U型反彈，代表他們還持有大量股票，很多時一面叫人唔使驚，另一面沽貨。大家千祈唔好埋怨別人俾假消息，投資就是自負盈虧，贏咗唔會分俾人，輸咗當然唔可以問人攞返。
很多人以為當股市下跌，一定會有不少人叫苦連天，怨天怨地。其實是錯覺，我唔知其他地方，在香港，股票投資者大多數會默默承受，那些大聲講話輸了幾多幾多的人，其實是晒命，代表他們輸得起。
近兩日股市大升千幾點，反而聽到不少人話後悔，在恆指兩萬三點的時候都唔落注，現在就恨錯難返。不過，叫他們即時買股，又未必敢，如此這般蹉跎歲月，到了股市上升到一個準備下跌的時候，那些人就會入市，仲會話股市還有大把上升空間，結果又是一條好漢，不過，股市雖然好好玩，但千祈唔好俾一些聲音誤導，當很多人話後悔時，原來股市正在上升，不但沒有買股票的人後悔，就算有買股票的人都會後悔，後悔買得少。
