有老友最近續租，續完之後同我講話最憎收租佬，我話不對，老友的業主是發展商，並不是收租佬，現在只是等善價而沽，所以不能調低租金，否則即是倒自己米，而事實上老友的屋苑，有不少單位是私人業主擁有，租金比發展商起碼平一成，老友話最憎收租佬，豈不是黑狗偷食白狗當災。
老友話佢冇留意到單位的租金與發展商差別，但車位就很明顯，不少車位由私人業主擁有，租金比較合理，最少比發展商平兩成，點解發展商唔減價，老友有所不知，發展商的最終目的是賣樓賣車位，如果減租金，就賣唔起價錢，所以，發展商寧願將單位車位空置，都唔會平租，換句話說，收租佬是穩定租務市場，令到租金不會飆升，政府如果趕絕收租佬，總有一日，發展商手握租金主動權，要幾多任他們話事，到那時候，租樓的人就會懷念收租佬，所以，政府千祈唔好趕盡殺絕，最後是官員做醜人，發展商是利益既得者。
