現在是否應該買樓

　　我在三個月前撰文話已經錯過了最佳買樓時機，不少人話痴線，疫情未過，移民潮未開始，樓市將會大冧，是業主錯過了最佳賣樓時機，並非錯過了最佳買樓時機，我當然唔敢反駁，否則會引來更多口誅筆伐。

　　最近有當日話我痴線的人問，現在是否應該買樓，因為他睇到美國商會在出售金鐘甲廈之後，以更高價錢買回中區乙級商廈，連美國商會都轉軚買樓，一般香港人更加應該買樓，我有些少不同意，美國商會當日出售金鐘甲廈是帶有多少政治意味，現在回歸正常，如果唔買，唔通商會會址都要租樓，萬一被人加租或者迫遷是很冇面的事，所以，貴一些都忍痛買回中區乙級商廈。

　　老友的問題相信一個大媽比我答得還好，大媽見到名店大減價，於是叫其他大媽去買，有大媽話，減價只是剛剛開始，稍後減得仲多，又有更多選擇。老實說，名店大減價是非同小可，那些比較優質的貨品很快被掃清，那個冇買減價貨品的大媽問現在是否應該買，如果唔買，名店回復正價，要俾多很多錢，現在買樓就是出現這個情況，優質物業已經被掃清得七七八八，陶冬都要用高價買樓，無可否認，樓價會繼續上升，好似名店取消大減價一樣。現在買樓，即使樓價仍然有多少優惠，但質素就一般，所以，我唔敢回答這個問題，問者自決。