細個時阿媽教我讀唐詩，第一首佢話是一首壓全唐，連李白睇到都要寫過第二首的黃鶴樓，結論是唔好借錢比人，債仔一定去如黃鶴，有人話我搞錯，一首壓全唐的應該是張若虛春江花月夜，我話我冇搞錯，我阿媽搞錯，以為唐詩三百首就是全唐詩。
今日早上回到公司，有老友打包了名店蝦餃燒賣等點心，仲話要賀一賀，老友一向是古道熱腸，有老友問
佢借錢，很少托手踭，但近年借的人太多，佢唔借反而被人話財困，老友做生意，財困二字會令人敬而遠之，借又唔係，唔借又唔係，很多時都很困擾。
老友邊食點心邊話，以後會甩難，不用借錢比人，理由是恐怕其他債權人同意，合法將債務削減至幾個%，雖然只得幾個％收回好過冇，但其實大家都知道，借出去的錢如潑出去的水，收回的機會是很低，但總算是持有一筆債項，仍然有一個希望，但如果以幾個%清數，以後債仔就會大大聲對人講，已經還清了所有債務，做債主真的是頂住條氣，幾個%不如唔收，債仔仍然欠一筆數。
老友話，那些借錢唔還的人有一個特點，就是借得很急，是救命錢，還得很快，差不多是上午借下午還，而且利息特別高，總之在人情難卻，息誘之下，很多人以為很快可以收回而借錢比人，結果債仔變成黃鶴，一去不復返，如果還幾個%就可以解決債務變成案例，恐怕以後唔會有人借錢比人，今次結果由壞事變成好事。
