我近期做訪問，很多時會被記者問及明年樓市會跌幾多，我反問記者點解咁主觀，不是問我明年樓市升跌幾多，而是跌幾多，原來記者近兩三個月做的訪問，所有專家都認為樓市明年會下跌，只是跌幅各有不同，甚至有專家用悲情樓市來形容，他們替香港業主擔心，我覺得很無謂，使乜替香港業主擔心，他們有咁耐風流，有咁耐折墮。
記者知道我講反話，於是問明年樓市升抑或跌，我話升，幅度是視乎香港幾時可以與內地通關，就算單向通關，即是來港的國內人士不用14天隔離，對樓市都有莫大刺激，我對記者講的時候仍然不知道香港可以獲得疫苗，否則，我的答案不是升，而是一定升。
有老友話我可能唔記得計算BNO計劃，報道說將會有100萬港人移民英國，影響所及有不少住宅單位推出市場，在供應多，需求因經濟轉壞而減少，樓價將會大跌，這是不爭的事實，老友可能不明白，BNO計劃其實是迫香港人賣樓，不過已經到了尾聲，過了今個月，如果以BNO申請英國居留的人仍然擁有香港物業，日後賣樓就要交英國稅，所以，因為移民英國而要賣樓的人已經時日無多，到了明年初，賣唔賣樓都冇所謂，一定要交稅，所以，對明年樓市影響不會太大，老友覺得唔啱聽，冇回應。
每年到了十一月，十二月以及翌年一月，樓市都會比較淡靜，在春節過後，地產商就會以較接近市價推盤，做成一個小陽春，今年因疫情嚴重，小陽春並沒有出現，到了明年，有可能出現一個較大小陽春，如果國內購買力及時湧至，樓市在上半年會出現顯著升幅，大行已經察覺到有這個可能性，大摩開始轉軚，預測明年住宅樓宇有2%升幅，大家千祈唔好以為2%是很少，大行預測通常會逐步加上去，如果明年上半年有升幅，不排除大摩或者其他大行會將樓市升幅調高。
最後一個理由，今年住宅樓宇不跌，代表業主堅守不賣樓，有如此堅毅的業主，我點解要潑冷水。
