有老友話，林鄭上京，其中一個任務就是開放香港健康碼，佢擔心疫情會反彈，應該繼續現行政策，直至確診清零一段時間才可以考慮發出健康碼，如果現在開放，萬一疫情反彈，一定會被非建制議員以及醫護鬧到失暈，就算建制派議員亦不是全部支持政府，所以，林鄭最好唔好要求中央政府開放健康碼。
我認為唔擔心得咁多，香港已經封關九個月，經濟受到重創，國泰不但要大量裁員，而且連港龍亦要即時結
業，如果唔開關，將會有更多企業結業，更多人失業，屆時政府想挽救亦無能為力，現在香港在抗疫方面做得唔錯，情況好似一場足球淘汰賽，上半場賽果只是落後0:1，隨時可以反敗為勝，但如果唔踼進攻足球，冇波入，就算唔失波都是輸0:1，任何教練都會在下半場踼進攻足球，甚至以前鋒更換後衛，才有機會反敗為勝，如果仍然打防守足球，不用等完場就知道一定輸波。
香港現在最大問題是軍心不穩，不少教練團成員以及落場踢波的足球員都希望球隊輸波，他們就可以指責領隊，林鄭也是一樣，全民檢測是抗疫一個好方法，但差不多變成全民抗拒，現在推行健康碼就會比較容易一些，但要多謝國泰，如果不是國泰大量裁員，港龍結業，估計國泰工會會帶頭反對健康碼，現在當然冇人夠膽，甚至連攬炒都冇人講，這是政府推行健康碼或者任何抗疫方法的一個好機會，如果政府唔博，唔敢開關，始終不會反敗為勝，畀人鬧都唔抵可憐。
