買股唔睇市盈率，買樓唔睇租金回報

　　有老友話我蠢到冇人有，現在買股票仍然睇市盈率，應該擁抱新經濟，買股是講概念，市盈率根本是廢物，所以我做極都做唔得大，老實說，我有現在財富已經相當滿足，人生於世，唔係只識得搵錢，但買股一定要睇市盈率，如果不以市盈率作為參考，樂觀而言，所買股票是天價，有無窮上升空間，悲觀來講，沒有收入，股票的價值是零，大家可以睇到匯豐宣布唔派息之後，股價跌超過一半就知道大家口中雖然話買股不用睇市盈率，但心中仍然非常著緊。

　　大家又千祈唔好以為買股票唔睇市盈率是新鮮事物，大約在20年前，科網股如日中天，當時大家不但唔睇市盈率，而且仲講燃燒率，即是公司資金可以夠幾耐揮霍，當時有老友叫我投資那些公司，我話我是一個保守的人，明知所投資的資金是會被燃燒，點解仲要投資，而且，就算蝕晒，那個負責人仍然可以話完成終極任務，很辛苦將資金燃燒完畢，我是舊經濟人，買樓收租算啦。

　　老友話有興趣一個我的物業，叫我開個價，我開了一個天價，老友話有冇搞錯，租金回報不足0.5%，我話奇怪，我以為老友唔睇租金回報，原來都有睇，咁都比較正常，如果買樓的人唔睇租金回報，我相信天下大亂，樓價升到唔知乜嘢情況。