有老友話，市場上多了很多銀主盤，是不是銀行向按揭客戶追數後果，如果銀行不斷向按揭客戶追數，樓市必然大冧，老實說，如果銀行追數，莫講樓市，整個經濟環境都會受影響，反過來說，如果太多客戶向銀行取回存款，即是大家所說的擠提，銀行一樣捱唔住，所以，銀行與客戶之間一定要有互信，更何況客戶有物業作為抵押，未到非迫不得已，銀行千祈唔好向客戶追數，否則結果是兩敗俱傷。
一向以來，銀行給予一搬市民感覺是好天遮，有任何風吹草動就會收遮，雖然不是什麼好名聲，但亦難怪銀
行，不同做其他買賣，有相當多利潤，銀行真金白銀借出去，賺個蠅頭小利，如果唔做好天遮，銀行很快就會執笠，但時移勢易，自從金管局推出逆週期措施，將按揭成數普遍壓低至不足五成，有一些甚至是兩三成，銀行可以搣甩好天遮外號，因為如果客戶週轉有問題，冇錢供樓，可以問財仔借錢，當愈借愈多，連問財仔也借不到錢，又冇能力還供款，業主唯有將物業賣走，還了銀行與財仔的貸款外，可能還有兩三成樓價落袋，所以，銀行是不用擔心按揭客戶不還款，既然唔擔心，又何必要做好天遮。
假如業主借到爆，銀行仍然不用做好天遮，因為財仔會向業主追收欠款，如果業主冇錢還，財仔就會收樓，將物業變成銀主盤，然後公開拍賣，在成功拍賣之後，銀行是可以收到全數貸出款項，包括利息，就算資不抵債，損失的是財務公司而不是銀行，既然銀行冇損失，又點解要做好天遮。
