我少時在澳門生活的時候，阿媽並不阻止我去賭錢，不過就要緊守一個原則，就是可以輸哂口袋裡的錢，不能向別人借錢。因為口袋裡的錢是有限，問別人借錢即是負數，那些人會向家裡追債，負數是無限大。一定要緊守這個原則，如果不能夠就寧願一世唔好賭錢。

　　有老友在油價出現負數之前平哂倉，雖然仍然有損失，但可以說是執番身彩。我問佢點解咁叻，佢話留意到一段消息，就是在4月8日，芝加哥期貨交易所將期油最低由0.01美元改為無限低，即是容許油價跌至負數。他知道負數即是無限大，如果唔平倉可能會輸死。我問佢點解唔將他的理解公諸於世，老友話曾經考慮過，但睇到匯豐不派息的事件，我不斷畀人攻擊，如果他的理解錯誤，就賣身都唔掂。現在做評論，不求有功，但求無過。

　　其實，我到今日都不明白，點解咁多不記名的人借匯豐不派息事件攻擊我？後遺症就是評論文章會轉趨保守，評論員不敢發表一些假設性見解，並不有利於投資者。

　　近幾日油價出現負數，大家認為匪夷所思，但又唔知點解。其實並不出奇，開工廠的人就會明白，他們有時會接到一些DA單，即是買家收貨才可以去銀行兌現。不過，不時會發生就當貨物去到目的地，買家拒絕收貨，唔收貨DA單就無效，買家可以唔畀錢，賣家唯有將貨物運回。在運回之前又要畀倉租，都唔知道損失幾多錢。到最後，廠家可能會貼錢畀買家收貨。在期油負數事件，買家其實必須要收貨，如果唔想或者冇能力收貨，就要貼錢畀下一位買家，整件事關鍵就是原油期貨交易所容許油價跌至負數。如果沒有改例的話，每桶油最少攞返0.01美元，買原油期貨的人輸少很多錢。