滙豐昨日突然宣布取消2019年末期息，以及2020年中期息。老友問我有没有滙豐，重唔重傷，老實說，本來很重傷，不過去年中，我老婆話我如果唔買樓，即是浪費丁權，於是我賣走了100萬股滙豐，買入陽明山莊一個7000萬元單位。老實說，當時我是非常不捨得，因為滙豐有6%回報，買樓收租只得2%多少少，但世事真的是很難預料，如果我繼續持有滙豐，現值只得4000萬元，所買入的單位可能跌咗少少，但一定會比繼續持有滙豐為佳。不過，我仍然持有多少滙豐，今次算是輸少當贏。
有老友問，可不可以告滙豐取消派息，當然可以，不
過浪費彈藥。滙豐是以監管機構要求為理由不派息，完全是合法，是否合理就見人見智。不少人認為今次滙豐取消派息，持有滙豐股票的人應該很慘。老實說，的確是，不過最慘的並不是那些人，而是滙豐本身，以後都唔知點面對自己的支持者。講得唔好聽，百多年信譽一日清倉。不過我有一個問題，滙豐就算唔派息，但可以派股，很多買股票的人都寧願收股票不收股息。雖然今次滙豐用監管機構做擋箭牌，但其實暴露了更大危機，莫非英倫三島缺水。否則，監管機構又點會要所有銀行不派息，講到最後，英國可能是最大受害者，取消派息是否值得，當事人心裡最明白。
有記者問作為滙豐股東，我有什麼感想。我首先澄清一下，我只是一個小股東，對於股票投資，不能夠太執著。升了覺得買得少，跌了又問自己點解唔早些少放，永遠長在後悔中，做人又點會開心，最緊要向前看。我在澳門長大，多少有一些賭仔性格，輸完又嚟賭過，冇乜所謂。不過，今次滙豐取消派消，真的是有多少耿耿於懷。順帶一提，很多人將外交部發言人耿爽讀成狄爽，現在應該知道是耿耿於懷。
