有年輕朋友最近買了一個非常優質，價錢又相當合理的住宅單位。他唔知道是否應該將這個好消息與別人分享，於是問我意見。我話如果唔想被嚇破膽的話，即管同其他人講。我夠膽寫包單，十個人之中，無一個會話現在買樓是一件好事，他們根本唔會理會是否優質單位，或者筍盤諸如此類，總之現在就不應該買樓。
我這樣說是有理由，因為同樣的事亦曾經發生過在我身上。在2003年沙士之後，大約在5月份的時候我買了
樓，我將這個消息同另外一個朋友說，誰不知被他嚇到幾乎破膽。佢話樓價仲有得跌，如果做七成按揭，好快變成銀主盤，我唯有話買樓自住，唔擔心得咁多，誰不知那位朋友對其他友人說我買了樓，彷彿我是一個傻仔。當時有不少銀主筍盤， 而我在以後的幾年，差不多每個月都買樓，同時採用逢三退一策略，將升幅很大以及不合用的轉售，在過程中亦產生了不少利潤，的確令人羡慕。但是他們不知道，我幾乎被人嚇破膽。
幾年後那位朋友在一個聚會上話我唔夠老友，有咁好機會都唔通知一聲。我話在2003年5月時買第一層樓的時候已經通知左，不過，大家意見不同，我以後亦不敢多講，而且我的膽很細，所以唔敢講畀其他人知。
買樓其實是一個很私人行為，無論之前或者之後，最好不要說給其他人知道。不少人在過去幾年在買了樓之後，帶有多少炫耀的心態同其他人講。不過，亦抵他們認威，樓價在這幾年間有升無跌。然而到了今日，那些業主或者會被其他人取笑，仲話樓價有排跌，就算我都會被人問揸咁多樓究竟驚唔驚，所以買樓的事，最好唔好同人講。不單止是現在這個時勢，在任何時候都不應該，因為樓市有上有落，上的時間無人會提及，落的時候大把人會落井下石。
