有人話政府冇事搵事做，地產商用招標賣樓是跟足新樓銷售指引，但政府見到在春節後樓價飆升，有理冇理認為是地產商招標賣樓引致。不過，政府又唔識得怎樣管理招標，於是由陳帆出面叫地產商自律。政府搞咁多事，最後只得一個人向地監局投訴，就算投訴成立，都是只得一個受害者，簡直是勞民傷財。
老友鬧得冇錯，但略嫌深度不足，政府叫地產商自律，並不是唔准地產商招標賣樓，而是要列出各項回贈及
優惠，透明度增加，買樓的人都放心一些。至於到現在只得一個人投訴，代表用招標買樓的人絕大多數已經得到高回贈，唔好意思投訴，就算當日未攞到最高回贈。現在只要他們出聲，地產商為免麻煩，應該唔會推搪。所以，只得一個人投訴亦唔出奇。
既然用招標買新樓的人大多數都得到高回贈，代表新樓的真正樓價並沒有在市場上反映出來。大家都只是睇到表面價，令到有一些買二手樓的人見到新樓的樓價如此高昂。他們不會介意多付一點，結果做成二手樓樓價急速上升。如果他們發現新樓原來有高達25%回贈，折實樓價比他們所買的二手樓更平，一定會很傷心，但又不能夠向EAA投訴。所以，我認為他們才是地產商招標賣樓下的受害者。不過，大家又不用擔心，那些人不會認為是買貴了。他們會話樓價只會高高高，有買貴冇買錯。
