一股不留大師之逆轉

　　香港股市連續三個交易日大跌，總共跌去二千幾點，我相信大部分人都極之不開心，但有一個人除外，就是一向被人當明燈，外號大師的沈振盈，他一直睇淡股市，但股市一直升，已經去到一敗塗地階段，但在這困難時候，港台竟然邀請大師出席城市論壇，可能無論在股市樓市方面，絕大多數人都睇好，在任何硏討會，聲音都只是一面倒，演變成非常沉悶，就算連城市論壇也不例外，港台負責人有見及此，於是搵沈振盈出席，大師知道這是千載難逢機會，於是語出驚人，話恒指在年底時會跌至二萬點，當時恒指是三萬二，一般股評員都認為恒指去到四萬點是指日可待，大師不但發表驚人言論，而且身體力行，表示已經全數沽售所有股票，一股亦不留，所以，他立刻得到了一股不留外號，大師言論被股場中人笑到面黃，不過，笑他的人亦唔笑得幾耐，好快就面青。

　　有線電視見港台綽頭唔錯，於是搵我同大師做了一個叫「兩盞明燈耀股樓」節目，老實說，雖然我經常睇錯樓市，但還是第一次被人當做明燈，我是澳門人，知道做明燈是很瘀的事，不過就沒有辦法，事實勝於雄辯，想反駁都不能。

　　當股市下跌了兩千點之後，大家對大師的睇法亦有所不同，從譏笑到讚賞，認為大師有曠世其材，否則沒有可能在大牛市之際，發出驚人言論，其實我明白大師心態，既然被人一直當做明燈，倒不如賭一鋪，大家睇升佢就睇跌，而且還要一股不留，如果大師當日跟隨其他評論員轉軚，今日股市下跌，他這個明燈外號更加穩固，這兩三日股市逆轉，大師的確是威到盡，股市之後樓市會不會逆轉，這還是一個未知之數，不過，有物業代理話股市大跌會令到投資股票的人膽戰心驚，他們會賣走股票轉而買樓，所以，樓市不但不會下跌，反而會上升，我覺得這才是大師級的言論，沈振盈都要企埋一邊。