樓市雖然瘋狂，但暫時未有危險

　　荃灣海之戀萬人空巷，有人話樓市癲過97，亦有人話，這只不過是地產代理做勢，將入票申請的人集中在75分鐘之內報到，倘若每一位申請人都有三幾位親友陪同，加上物業代理，做成萬人空巷局面絕對不難，有記者問我樓市有冇危險，我話暫時未有，主要是因為地產商願意為買家提供八成半按揭，即是地產商都睇好樓盤，樓市睇落瘋狂，但沒有危險。

　　有人話政府要遏止今次升市是很容易，只要收緊地產商八成半按揭，老實說，這的確是一個有效方法，但政府千祈唔好做，因為新樓銷售熾熱，代表供應量真正的釋放到市場，而且會有連鎖反應，有很多買新樓的人，即使他們採用八成半按揭，在財務上毌須賣走自住單位，但如果唔賣，就要付15%印花稅，換句話說，新樓提供二手樓供應量，政府點解要出招壓抑地產商賣樓，助他們一臂之力才是正確做法，所以，金管局收緊二手住宅按揭成數，買樓唔該買新樓。

　　當新樓入伙，一定會有人被迫要賣他們的自住單位，屆時他們就會發覺，不容易賣到理想價錢，唔好講創新高價，甚至比市價低亦很難出售，但如果在六個月內唔將自住單位賣走，他們不能退回已付的15%印花稅，二手樓樓價亦會開始回落，這就是政府的目的，唔將樓市變得瘋狂，樓市是不會滅亡，但無論如何，只要地產商依然願意提供八成半按揭，樓市是沒有危險。