有劉有高潮

　　我們在少時候去玩，有時會跌到一仆一碌，起了一大個腫瘤，阿媽見到實鬧到飛起，我們一定話唔緊要，最緊要玩得開心，有瘤有高潮，估唔到這句話在幾十年之後，在香港人被一個非常現實小姐唱紅，不過就變成有樓有高潮，老實說，我聽唔到人鬧佢，不過，就有不少女士認為佢唔值，男士就會話如果有一層2,000呎樓就唔揀佢，原來全香港都咁現實，大都會的特徵之一。

　　香港選特首，林鄭幾乎收盡天下兵器，我在飛機上寫這篇文章時，知道曾俊華入閘，胡官亦沒有問題，不過就唔多滿意，最唔滿意當然是葉劉，就算可以入閘，都不知道費盡了多少唇舌，又要低聲下氣，好似跪地餵豬乸，老實說，我都唔知道點解咁多人鍾意做特首，其實，有樣辦俾大家睇，收場都唔係幾好，最多只是曾經風光過。

　　根據今年大熱金句「有樓有高潮」，選特首就唔能夠沒有葉劉，否則就會失色不少，如果沒有葉劉，就算其他參選人全部入閘，結果其實早已知道，曾俊華同胡官早已打定輸數，些少高潮都不會出現，但如果葉劉入閘又絕對不同，結果雖然不會改變，不過，她見到形勢不佳，一定會出聲話班選委偏幫林鄭，論資質，兩人不相伯仲，論管理，兩人受同樣訓練，況且，葉劉自問對國家忠誠度比其他參選人高，又夠膽將23條立法，所以，葉劉如果能夠入閘，一定高潮疊起，同時應了今年金句，今次是「有劉有高潮」。