閃辣15%DSD 業主+上車喜訊
15%DSD理性分析
@盤源：巿場上租盤速減。
@一手：發展商無懼，財雄勢大，你哋肯買我肯為你繳稅。
@實力派業主：更無懼，細價樓依然需求殷切。
@優化組合者：如細換大、舊換新、新界換巿區、無會所換會所。似乎他們靜候發展商，等待出擊，但短期仍影響租盤供應。
@欠債業主：屋陳常勸君「賭字頃家產，貪字得個貧」，如果唔係多得呢啲老闆，我哋又點執平貨。玩期指，牛熊証、孖展老闆，本來在高樓價下按盡，手運唔好的話，好容易反艇。屋陳再三奉勸各位攞自住樓賭千萬不可！作為投資者應視他們為良好合作伙伴，您出錢出力救佢，解決佢燃眉之急，佢又賣個好盤比您，何樂而不為，不過記得要挫一挫價啊。
@上車客：仲等？馬上步署這一個跌浪，屋陳唔係神，預知唔到今次跌幾多，係短抑或長跌真係好睇大勢，不過我知小勢必然，政府每次出招都會激起短期作用，如果我叫您而家買，小勢賺咗，但大勢輸咗，屋陳也會心唔安樂，人們總常睇結果，賺左冇嘢講，輸咗實會鬧爆人。所以屋陳而言短期值得一博，如果今日唔開始部署定，個巿跌幾多都唔關您事。
各界因應巿場變化而做法不同
抽幾個講下
一手做法：
1.重新賣樓組合，屋陳諗到如遇手持一間或多於一間的投資客，應會回贈給他們，未必全部但會對巿場起刺激作用，只不過發展商會睇定後巿即大勢，唧牙膏般賣樓，因也要計計荷包有冇水位。
2.另一做法以500萬為例，15D即額外付稅75萬，當發展商承受全部的話，也會想盡辦法起個超級豪華會所由乜乜名師，講個名您哋都唔識，如華倫天奴畢加貝比施設計、路易溫頓蓋倫士、白圖加拉斯已索等等...，這些經名師設計出的超級會所可從管理費中反影出來，比如以前$3尺，而家要$6尺管理費，足足加100%，細數目無人覺，400尺實用單位只係$2400管理費又唔多覺，要想知道樓價可以賣段，但管費不能。
實力派業主做法：
以屯門200全新樓為例，額外多付30萬稅，實力派把三兩層樓盡按，一炮過付稅及付樓價，眼白白比稅局的30萬可分20-30年還，以30年計算每月只需多比$833本金利息未計，如加埋現息P-，我當2.2厘，即利息也不超$500，加起來$1400有找仍然有So!，業主識做只會從租金反映出來，租樓者惟有硬受。
優化客做法：
以九龍一舊樓為例，原業主想變現購東涌新樓，本身自住巿區，因優化住屋需求，變現換好，打算把舊單位收租，變相巿區應多出一個新租盤。但因15d閃出，優化客惟有等待發展商減價。
屋陳主觀入巿係幾時？
上車客！我們要真心多謝財金官出手相助，我們慳了Step1部署嘅氣力，大致樓巿先回十多幾巴仙1x%；
Step2再多1x%的話要睇美選前後的道指指示，無論選出邊個都好，股巿一定有大波動，這是巿場經驗，我們大致上google search下，有邊個選出後唔跌巿就pm我知。
Step3嘅1x%等美國加息時美金升人仔跌，港樓對沖外幣貶值相對作用顯著，前幾個月已po過講過n+1咁多次，曾比人鬧美息減又話升美息加又話升。如果焦點放在估聯儲局今云加唔加息，屋陳前幾個po講過，有80%機會加硬。
由Step1至3加起嚟樓巿會否跌30-40%，屋陳大膽講句「會」，仲會係100%機會「會加息」上一個po在另一論分析過加息機會達80%，等等！未講完，請各位睇埋落去先決定買唔買樓.......，但係由於樓巿已經由巿場主道變成了政策主導，跌40%幾乎係夢想。
點解？
因為.....
1.「15%DSD政府可以慢慢玩」，巿跌時政策放寬，唧牙膏般減辣，起地產商方面學足嘢，所以「好人官」話齋，今次出招唔重架喇。
2.「二手被冰封」，租盤劇減，代理求盤情況湧現，成交少了CCL被拖底，租金急急上升。
3.「新樓樓花期歷史性長」，您用錢買層樓比首期，要供3-4年後先入得伙，頸都長啦。
4.「人口老化，正苦引入移民策。」財金官早一個月講過，唔知話三十年後人口急速老化，大家知會點影響樓巿啦。
5.「起新公屋拖泥帶水」剛需慘輸落後，在此唔多講。
三類投資者心態：
1.投資者手執多間，無咁輕易放賣，賣咗唔會再買益稅比政府。
2.手揸多間享現金流，缺錢洗情況下，只會從手上物業㩒機攞錢，因為息平，就算加息每季0.25一年才1厘，抵呀！
3.手持兩三間，更唔會賣除非好價，否則不會賤賣，「持貨享升值，掟貨等乞食」，人要有進步，這類投資者等緊機會執多間。
屋陳主觀還主觀
如果您係醒目仔識同老闆、同事、稅局、銀行、代理打好關係嘅，大力挫價吧啦！如果呢幾個月執到扺過巿價20%好叻仔架喇，有心上車要留意，12月係聖誕，coming農曆新年比往年早到，這兩個歡喜嘅日字係樓巿傳統嘅淡季，加上美選在聖誕前有結果，道指係一個好重要嘅指標，有些業主因要過年，所以好等錢洗，襯機會出擊啦。
利申：家族及圈子裡本身沒從事地產生意。將來唔敢講，都控制唔到別人
屋陳向部分唔啱聽業主們表歉意請多多包容，志在分享下讓有心人上車。
都知道是會出新招壓抑樓市，在記者會後，評論話政府食言，財爺曾經講過如果再出招，就要通過立法會，但我又唔覺得政府食言，因為今次並不是出新招，而是對雙印花稅作出了修改，在房地產行業行內人語，這是翻新，所以，毋需通過立法會，就算要通過又如果，即使現在，立法會兵慌馬亂，建制泛民為了人大釋法而劍拔弩張，但如果要出招打撃樓市，即使是翻新辣招，建制泛民一定會暫時放下敵對的態度，為了一個共同的目的而走到一起來了，而壓抑樓價就是他們共同的目的，所以，要通過立法會是絕對沒有難度，倒不如放政府一馬，希望政府在適當時候放寬部分辣招。