有記者打電話給我，佢話林一鳴封blog，我唔見咗過老對手，問我有沒有些少失落感覺，我老實答，真的沒有，我和林一鳴很少交流，林兄不屑認我做對手，只有在今年二月初，我寫的「細價樓爆煲論」大熱，林兄急不及待反駁，認為當時買樓好過六個月之後買，我迫不得已下賭注，結果是我輸了，但林兄又唔應約，害我無端端使咗幾十萬，但林兄唔明白我的意思，我只不過是希望未有能力的人唔好急切上車，就算六個月之後樓價比我發表爆煲論的時候高，但之後影響樓價的各種負面因素發生效力，在利息上升，供應增加的情況下，樓價一定會下跌，況且，林兄料事如神，股市熊市亦能夠準確預測得到，這又怎可能股市大跌，樓市不跌反升。
我接觸過不少最近買了樓的業主，當他們買樓之前覺得林兄所言非虛，但買樓之後又睇到各項負面因素，雖然樓價有升幅，但是由於有SSD，他們不能夠將新買的物業賣走，眼見美國將會加息，新樓供應源源不絕，零售寒冬，問我點算，我真的唔知點算，我叫他們問林一鳴，可能因為太多人問，所以林兄封blog，我個人認為林兄毋需這樣做，做評論員只不過將自己意見說出來，並沒有叫人買樓抑或賣樓，他們買不買樓的行為，應該由他們自己負責。
林兄話封blog是因為他猜中熊市，受到不少好友攻擊，封blog是最快，最直接的解決辦法，我又認為這點值得商榷，香港的股民不會如此橫蠻無理，我的「細價樓爆煲論」輸到甩轆，都沒有太多網友攻擊我，嘲笑就有多少，如果我估得準，一定會得到不少讚美聲音，照計林兄的熊市理論應該得到讚美而不是受到攻擊，畢竟香港人是有容人之量，絕非袁紹之徒，林兄過慮。不過，封blog亦都是好事，否則，三個月後，大家睇到樓價明顯下跌，到時候林兄所受到的壓力就會很大。
