A股屢跌屢救，體驗曾國藩精神

　　很多人睇過洛克斐勒家書，我反而冇睇過，不過，我就睇過曾文正公家書，傅雷家書，我相信很多香港人連聽都未聽過，邊個係曾文正公，原來是曾國藩，而傅雷又係邊位，係傅聰老豆。閒話少說，當日，曾國藩帶領湘軍同太平天國開戰，打極都輸，於是寫封信回家，叫屋企人收拾細軟，準備逃避戰亂，當曾國藩寫到與太平天國軍隊交戰情況，最初用上屢戰屢敗，但感覺到唔係幾妥，話晒都是一家之主，於是改用屢敗屢戰，後來，向清廷報告戰況是亦自稱，臣屢敗屢戰，以示其戰勝決心，清廷收到曾國藩奏摺，不但不加罪，反而多加冕勵，最後，曾國藩擊潰太平天國軍隊，開始反守為攻，其實，清廷上下已經震過貓王，朝廷中人擔心曾國藩帶領湘軍投降，清朝就立刻玩完，所以，無論曾國藩寫什麼都會嘉許，曾國藩亦知道，他用上屢敗屢戰之後，跟著就問清廷攞軍備，糧餉，無論以前抑或現在，有錢打仗，勝算都會高許多。

　　昨晚，消息指內地有21家證券公司集資1,200億救市，不少評論員認為是利好消息，可以穩定A股跌勢，我認為今次大大鑊，內地証券商咁樣做即是話俾鬼佬知中國政府已經冇能力救市，索羅斯今晚開心到瞓唔著，立刻叫齊所有主管，基金經理開會，準備在A股市場大掠一筆。我話很少香港人讀過曾文正公家書，原來，內地亦不太多人讀過，起碼那12個證券商就未讀過，試問，當日清廷唔支援曾國藩，改由地方富商集資支援，湘軍能夠打敗太平天國軍隊就出奇，今次，21個證券商真的是幫倒忙，肖鋼真的是多謝他們不少，今次場仗真的是很難打，不過，尚有一線生機，就是那21個証券商一定要死守承諾，未到4,500點就唔沽貨，如果再跌就再加碼，以毛澤東不怕犧牲，排除萬難的精神，一定可以爭取到勝利。最怕就是這21個証券商有人做逃兵，咁就大件事，今次肖鋼一定要好似那些在後方指揮將軍，邊個做逃兵就殺邊個，咁樣或者可以嚇到索羅斯班人。

　　今次A股市場大冧，大家就可以睇到香港以及內地股票市場分別，在復活節之後，不少香港證券商又話大時代來臨，甚至應該賣樓買股，但香港股民一於聽唔到，有一些人還趁高價位賣走了一些股票，實行賣股買樓，做成豪宅熱賣，樓價飆升，講到底都是信磚頭好過信張紙，這個理論睇落好淺，其實是非常高深，內地股民要經過多幾次大時代才會明白。