有老友移民幾十年回流香港，昨晚去銅鑼灣食晚飯，非常激氣，原因是想食一些貴價海鮮，點知餐廳欠奉，只介紹一些在魚缸𥚃的海鮮給他，又貴又一睇就知道已經養咗幾日，唯有叫晚飯小菜，餐廳經理面口又唔係幾好睇，老友記得他在移民前去銅鑼灣晚飯，幾夜都有新鮮海鮮，點解以前有，現在冇。
老友離開太久，銅鑼灣食肆起了變化，以往有一間德記海鮮，負責供應各高級食肆的海鮮，收費當然貴一些，但是
那些高級食肆自唔使備貨，唔使請魚王，唔使設魚缸，又沒有損耗，無形中心慳了不少錢，就算條海魚沙皮都由德記負責，理論上俾貴些少都有化算，但做生意人的人太識計算，要賺盡每一份錢，德記冇生意唯有執笠。
德記執笠之後，食客去到那些高級食肆，往往食唔到他想食的海鮮，例如王勒變東星，一斤重變兩斤重，一兩次之後，客人再唔去那些高級食肆，如果德記仍然生存，那些高級食肆生意一定有得做，有時做生意真係唔能夠計得太盡，否則最後受損失都是自己。
我叫老友不用擔心，一樣有新鮮海鮮食，幾個人去街市揀一些靚海鮮，跟著攞去一些打麻雀會所叫他們加工，風味差不多，不過地方屈質一些，但比高級食肆平好多，又可以食到自己鍾意的海鮮，老友話，屈質算什麼，最緊要幾個老友食得開心，叫乜冇乜，又點會開心。
