唔想還錢最好搵人打

　　今日中午同老友食飯，佢話早兩日約了一班債主向一個大天二收數，去到之後大天二話有一個門生被人恰，日日淋門生紅油，佢吹雞搵那人開片，有乜事等佢打完交先講，成班債主見到大天二的馬仔個個兇神惡殺，唯有話等大天二做完正經事再嚟。

　　老友話，現在全世界都唔知點解特朗普炸伊朗核設施，早兩日不單特朗普自己，甚至連白宮發言人利維特都話在兩個星期內如果仍然解決唔到問題，就會炸伊朗核設施，至於點解會提早，估計是特朗普想用兩個星期搵盟友，以聯軍的名義炸伊朗核設施，結果除了以色列之外，搵唔到第二個國家支持炸伊朗，既然搵唔到人出名，不如早些行動，希望伊朗立刻投降，美國可以耀武揚威，獨佔花𣁽。

　　老友是有道理，不過亦應該考慮，美國現在欠債太多，六月份是還款高峰期，如果唔買返啲美債，以後就冇人相信，評級機構已經調低美國評級，再跌就會有不少機構基於機制，一定要出售美債，咁樣就大件事，想唔還錢最好是打仗，伊朗就唔好彩，內塔尼亞胡做醜人，不斷指責伊朗即將擁有核武，其實這個指責已經超過三十年，基本上不能成為控罪，但美國當真，在沒有組成盟軍的條件下攻擊伊朗，持有美債的國家以及機構見到美國正在打仗，又點敢追債，老友話，咁樣同大天二差不多，老友錯了，是大天二同美國差不多。