塘邊鶴一定贏硬

　　有學者話，根據他的分析，樓價會從高位下跌六至七成，現在只是下跌了三成多，遠遠未夠，仲要下跌多一倍，有老友非常擔心，如果樓市好似學者咁講，他隨時會變成負資產者。

　　我叫老友不用擔心，學者食飽無憂米，有一份好工，薪高糧準，得閒出嚟發下噏瘋，準唔準還是其次，起碼可以得到不少無樓一族，或者剛剛賣了樓掌聲，在學者來說，已經達到目的，就算日後樓市不跌反升，已經冇人記得學者曾經講過乜嘢，他當然自己不會認輸，最後不了了之。

　　有人問，我在賭場見過咁多人，什麼人的贏面最高，我話贏面最高的人我唔知，但必勝的人我反而知道，就是那些塘邊鶴，在未開之前就會話一定開大或小，開莊或閒，如果真係俾那些人估中，就有排講，如果唔中，他們會自動消失，不過，那些人最怕就是估中之後，其他人問究竟贏了幾多，如果話俾人知冇買，其實是很失威，所以，那些人在自吹自擂一番之後，就會自動消失。

　　雖然樓價下跌了三成，但樓價指數在最近九個月是保持平穩，大約在135點，我當然不敢擔保樓價不會繼續下跌，但在利息下跌，國內優才，專才，學子湧港，租金上升的情況下，要樓價大幅下跌是很困難，學者咁大膽武斷，只不過是語不驚人死不休，唔講得咁狠，邊度有人理佢。