有老友話我最近紅爆，賣樓都上了頭條，做咗網紅，我話如此這般的網紅，不做也罷，而事實上那些是網暴，有網民話，連自住樓都要賣，梗係唔掂，老實說，如果只得一個自住單位，梗係唔賣，我有十幾個，賣走一個，收返兩億，享受人生，究竟有什麼問題，其實，現在睇賣樓的人掂唔掂是很容易，如果是銀主賣樓，業主一定唔掂，如果業主自己賣樓，衰極都有個譜，今次網民反應，連我都嚇一驚，如果今次是銀主賣樓，真係不堪設想。
我在辣招推出之前，被問及如果一個普通人，如何投資房地產，可以在退休時有足夠保障，
當時我提出三間樓投資法，就是在三十歲之前買一個自住單位，在四十歲之前買第二個單位，一個出租，一個自住，三十五至四十五歲是當打，搵錢之年，可以的話，在四十五歲多買一個單位，兩個收租，一個自住，希望在退休的時候能夠擁有三個無按單位，至於應該住大單位或者細單位，到時再決定，如果與子女同住，一定要住大單位，如果只得兩公婆住，細單位就可以，有兩個單位收租，退休後的生活不成問題。
三間樓投資法有一個規矩要遵守，就是在退休時不能問銀行借錢，既然已經退休冇收入，借咗錢唔知點還，如果按揭未清，唯有賣走一個單位甚至兩個單位，所以，用三間樓投資法，愈早愈好，早些清哂銀行欠款，唔使等退休都可以享受人生，本來是一個很好計劃，但無端端被政府打殘，政府聽從冇樓市民聲音，買第二個住宅單位要付15%印花稅，試問又點會有人咁蠢俾咁多印花稅，三間樓投資法行唔通，唯有買那些風險比較高的金融產品，不過，政府雖然唔贊成市民買樓收租等退休，但很多高官擁有幾個單位，這代表政府官員亦同意三間樓投資法。
真係唔知點解政府會突然撤辣，在政府撤辣之後，三間樓投資法可以重出江湖，不過，現在的銀主盤比較多，甚至去到每兩個二手樓單位成交，有一個是銀主盤，而銀主賣樓，不論樓價好醜，但求快手，所以，在撤辣之後，樓價仍然下跌，買第一個單位是沒有問題，買第二個單位就要考慮清楚，或者唔好借得太盡，慎防被銀行追差額，只得一個單位就不用擔心，銀行很少向只得一個單位的業主追差額。
由於辣招推行了15年，不少有能力買樓的人並沒有在這段時間置業，現在已經過了四十歲，是否可以買樓，我認為如果仍然未有樓，的確可以考慮買返一個自住單位，但最緊快，過咗四十五歲就唔好買樓，否則要孭住一筆貸款退休是很悽慘，老實說，三間樓投資法並不是一個完美的退休計劃，但對於一個普通人，以小弟為例就非常好，而事實上搵適合自己的投資法才是最好的退休計劃。
