的士司機公會話罷工五日，要求政府取締網約車，特首話罷工不是解決問題方法，不得民心，估計公會唔敢罷工，其實，的士隨時隨地都罷工，甚至罷到市民唔敢坐的士，駛乜申請，如果大家唔信，請留意一下天氣，當下雨的時候，立刻有的士司機冚旗罷工，雨愈落愈大，冚旗的士愈多，如果在晚上，大家見到全街都是亮了燈的空的士，但又見到不少市民爭的士，甚至爭到打交，我講大家未必相信，打交的市民不會埋怨對方，反而憎恨冚旗的的士司機。
有不少人同我講，如果可以輕鬆截到的士，他們是不會叫網約車，但問題是，唔係冇空的士，
而是冚了旗慢駛，有時候會停低問截車的人去邊度，跟著就不屑離開，咁嘅態度，無形中替網約車大開大門，現在網約車做得唔錯又逐漸普及，的士司機又要求政府取締網約車，老實說，以前幾個特首我唔敢講，今屆特首一定唔會，不得民心的事，超哥點會做。
其實，只要的士司機承諾，不會隨便冚旗，尤其是在大風大雨的時候，不但不會冚旗，甚至主動出車配合市民需要，雖然承諾大多數做唔到，但要政府取締網約車，起碼都要俾些少誠意，不過，的士司機公會亦知道，如果取締網約車，更多的士司機冚旗，而且不止在落雨的時候，甚至隨時隨地都冚旗，所以唔敢作出承諾，不過有人話的士司機公會不能作出這個承諾，否則即是承認的士司機冚旗，香港的士從來不會冚旗揀客。
