年初三，人稱赤口，即是鬧交，一般都唔會去拜年，但幾個老友坐埋一齊吹下水，探討天下大事亦無不可，有老友最近有銀行大手筆買債仔物業，並且認為銀行有擔當，冒着樓市下跌風險買債仔物業，不過，亦有人不以為然，理論上銀行唔應該買債仔物業，而所冒風險並不是樓價下跌，反而是樓價上升，債仔會認為銀行沒收他們的物業，迫他們賣樓，
目的是吞併他們的資產，就算打官司都有機會贏，就算唔贏，都會令銀行信譽受到損失，所以，銀行家會將沒收了的債仔物業經合法程序賣俾第三者，能夠收回所欠款項即是賺了錢，這亦是銀行家正確做法。
銀行買債仔物業是穩定樓市是誤導大家說法，銀行買債仔的物業目的只有一個，就是賺錢，如果要穩定樓市，用一半錢就可以，就是借錢俾有興趣買那些物業的人，現在最多借一半，即是出一半錢就可以，銀行又何須自己買樓，老實說，我雖然話今年樓市會反彈，但不一定準確，萬一樓價好似七師傅咁講跌多兩三成，銀行就損失慘重，如何向股東交代，如果借錢俾人買，莫講跌兩三成，就算跌四成銀行都唔使輸錢，如果銀行有心穩定樓市，不如借錢俾人買樓。
至於銀行點解唔肯借錢俾人買樓而自己買，其實很簡單，由於銀行不斷call loan，令到有不少業主要出售最優質物業，銀行家亦知道樓市跌無可跌，買家能夠full paid買樓就冇得講，如果是由銀行借錢俾他們買，有多少為他人作嫁衣裳，既然如此，倒不如自己買，日後如果有巨額利潤，銀行家都可以分紅，老實說，銀行是不會做蝕本生意，樓市是否見底，觀其行便可以，銀行家行動代為他們睇好樓市。
