不時有國內老友到我屋企食飯，當中有人見我屋企的裝修唔錯，希望我介紹負責裝修的師傅，我通常會話，那個裝修師傅價錢貴，交貨慢，而且脾氣很大，真的唔敢介紹，我的老友都是明事理的人，他們亦知道不做中，不做保，不要介紹裝修佬。
有不少人試過將自己用過，認為滿意的裝修師傅介紹俾老友，但唔知點解，自己滿意，別人投訴，
最後老友都冇得做，問裝修師傅點解做得唔好，答案一定是客人太過腌尖，做完又改，改咗又唔找數，單裝修工程最後要蝕本，問自己老友，答案剛剛相反，一定會話裝修師傅收咗錢就失了蹤，唔繼續俾錢就唔開工，所聘用的人又唔夠班，搞到佢要搵其他裝修師傅執手尾，亦唔會打算付尾數，在咁嘅情況下，你叫介紹人點算，所以，唔做介紹人就最好。
如果裝修師傅用自己團隊做，就算有問題都可以解決，但做得好的裝修師傅生意又會幾好，他們有可能外判一些工程俾其他裝修師傅，自己只做監督，做外判的師傅覺得被人賺了一筆，水準便會出問題，如果業主唔滿意，可能要搞一段長時間才可以解決，最後，他們甚至會將責任歸咎於介紹人，業主會話點解可以介紹一個咁不負責任的裝修師傅俾佢，而師傅則會話業主太過腌尖，早知道唔接這單生意，所以，冇必要都唔好介紹裝修佬俾人，其實，打算裝修的人可以搵一些工程公司，明碼實價，雖然好似貴了一些，但最後埋單計數，可能比老友介紹的裝修師傅平很多，所以，冇必要都唔好叫人介紹裝修佬，更加唔好主動將裝修佬介紹俾人，唔會有好結果。
