友人問我題目是否寫錯，應該是色乃削肉鋼刀，其實絕對冇錯，對一個香港業主來說，由於利息升得太高，本來有錢賺的生意變成蝕本，高息名符其實是削肉鋼刀。
友人話，即使我講得冇錯，息乃削肉鋼刀，但特首又冇權減息，對現在付高息的人來說是沒有幫助，老友可能唔知道，銀行點解可以收取高息，就是物業按揭成數太低，不能超過五成，否則就要補差額，
如果補唔到差額就會畀銀行call loan，客戶冇錢還，所按物業就會變成不良資產房地產貸款違規，銀行可以理直氣壯收取高息，在今次特首施政報告，大幅提高物業按揭成數上限至七成，與政府未推出逆週期措施一樣，在這個按揭成數下，大多數按揭客戶都不用畀銀行call loan，銀行唔call loan，按揭客戶就不用付高息，有機會生存下去，生意不用執笠，對香港來說是利大於弊，銀行可能會少收多少利息，但唔會俾客戶鬧銀行是好天遮，如果客戶唔遵守貸款合約，銀行可以大條道理收樓甚至將欠款利息提高，客戶亦無話可說。
友人問，點解從未聽過有銀行要求金管局放寬按揭成數，銀行點會咁蠢，面對一大堆放在砧板上的肥肉，揸住把刀叫利息，可以慢慢宰割，受害者只是那些貸款超過五成，而又準時還款的客戶，特首施政報告大幅提高按揭成數，令到銀行唔可以向客戶收取高息，做生意的人有一個喘息機會，所以，施政報告即使冇講減息，其實是幫了不少按揭客戶減少利息支出。
