有老友話有急事搵我，不過唔係問我借錢，叫我放心，神神祕祕，都唔知有乜事。
老友話自己除了有私人住宅之外，仲有一個公屋單位俾親戚住，現在政府雷厲風行，決心打擊公屋租戶不能擁有
私樓，違例者不但要交回公屋，仲要坐監，交回公屋絕對冇問題，已經預咗，但如果要坐監，就很大件事。
老友話有很多人叫佢現在立刻將私樓賣走，只留低公屋，咁樣做或者唔違規，我話千祈唔好，因為私樓有在田土廳登記，就算立刻賣走都唔能夠改變曾經擁有這個事實，政府追究起上嚟，同樣會沒收公屋，到時候公屋冇，私樓又冇，仲可能要坐監，由於這是有計劃欺騙政府，判刑可能比那些同時有公屋收及有私樓的人為重，因為那些人可以狡辯他們是因為不了解，無意同時擁有公屋及私樓。
我問老友明知租用公屋以及擁有私樓是犯法，點解唔一早交返間公屋，原來老友亦打算交返間公屋，不過有人同佢講，佢可以買私樓是因為間公屋風水好，點解要交返間公屋俾政府，就算被政府查到有私樓，到時才交回公屋還未遲，況且在香港做官的大多數宅心仁厚，唔會強逼公屋租戶交返間公屋，每年最多搵幾個人交下差，又唔會有人投訴，而輪候的人又唔知有咁多人有公屋又有私樓，而那些霸住公屋的人一定會對官員歌功頌德，反之，現在政府要收回公屋兼坐監，有關官員一定會俾既得利益者咒罵祖宗十八代，不過，慈不掌兵，善不為官才是大道理。
現在最簡單而又最有效方法就是立刻將公屋交返俾政府，希望政府唔會追究，而政府控告那些擁有私樓的公屋租戶，最終目的是希望他們交返間公屋，既然已經達到目的，政府亦不會趕盡殺絕，要那些主動交回公屋的人坐監。
