賣樓才知道什麼是Location Location Location

　　有老友打單賣走一個物業，並不是價錢問題，他雖然有開價，但歡迎還價，但竟然連睇都冇人睇，老友唔明白，當日在他買入的時候，有很多人爭，他要預早簽下必買必賣合約才可以買到，但點解今日連睇都冇人睇。

　　我問老友物業代理有何解釋，老友話代理表示物業不是坐落在最好的地區，亦不是區內比較好的大廈，甚至可以說是比較差，而且樓層太低，就算過了兩關，睇樓的人都唔會睇，他們會對代理講如果有高層就會考慮，我話代理講得全中，這就是Location Location Location ，如果三個Location 都唔合格，真的是很難賣。

　　大家都聽過什麼是Location Location Location ，但只是知其然而不知其所以然，根本唔了解，尤其是在買樓的時候，只是關心樓價升跌，不過，當他們賣樓的時候，就會了解到什麼是Location Location Location ，正所謂醉過方知酒濃，以後買樓就會要求Location Location Location 。

　　今次樓價下跌，受傷最重的可能是新晉財仔，據聞已經有不少新晉財仔執笠，理由是手上的銀主盤很難賣走，財仔唔係業主，對物業質素要求不高，以估價七成借出，基本上是沒有危險，但估價師是不會理會物業的Location Location Location ，只是按最近成交價做參考，如果成交是質素好的，估價就會減多少，但財仔唔知道，那些物業是很難賣走，尤其是在樓市下跌的時候，大家可以去揀質素比較好的物業，點解要買Locations 不佳的物業，那些按在財的物業，可能在銀行翻按，債仔唔還錢，財仔亦冇錢還，最後唯有執笠，以後，Locations 不佳的物業，可能很難借錢。