股市大升，點解銀行股升咁少

　　有老友問我，近日股市大升，就算星期二大跌，但仍然升了三千幾點，有個別股票升幅超過五成，以港交所為例，由230元升到星期二股市大跌之後，仍然有340元，升幅接近五成，但點解銀行股唔升，其實銀行股比港交所更有大升空間，銀行除了與港交所一樣收取服務費，並且可以收取息差，理論上應該比港交所升得仲勁，但點解港交所大升，銀行股唔升。

　　我認為有兩個因素，一個是自侮，一個是人侮之，在過去一年，不少持有股票的人因抵押物業估值下降而被銀行call loan，最後被迫賣走手上股票，那些人就算買返股票，都唔會買曾經call 佢哋loan的銀行，少了那些人買銀行股票，股價想升都難，銀行真係唔知道call loan最後call走自己生意，盈利受損，就算股市大升，股價仍然停滯不前，萬一股市回調，銀行股就會承受很大壓力，股票投資者絕對明白這個道理，試問又點會在現階段買銀行股。

　　另一個原因是人侮之，銀行call loan，客戶就未必有錢還，但就有大約一倍抵押品在銀行，理論上非常安全，但銀行不考慮這個因素，客戶冇錢還，銀行就將那些貸款列為不良貸款，或者房地產貸款違約，但外媒／分析公司就唔理，一於將那些房地產貸款違約列為壞帳，外國投資公司見到香港銀行有咁多壞帳，又點會買銀行股票，股價又點會升，而事實上有不少香港人過往只買銀行股，現在銀行股早已不在考慮之列，甚至將手上銀行股賣走，沒有人買的銀行股，股價又點會上升，而事實上銀行call loan之後，銀行的盈利亦將會大幅下降，唔買銀行股亦是正常的。