星期日早上，老婆問我有錢最好做乜，我話「無酒安能邀月飲，有錢最好食雲吞」，晚上，餐桌上有三款雲吞，韭黃，酥炸，錦鹵，仲有一支「九」清酒 ，咁大陣仗，當然有所求，不過無論如何，食咗再講。
老婆話有二千萬定期到期，有乜好投資，銀行叫佢繼續定存，但老婆唔想，佢打算買樓收租，但銀行話老婆年紀太大，又冇收入，唔會批到按揭，況且中原指數仍然下跌，現在不是買樓好時機，續存三個月再打算，老婆問佢是否應該續存。
我對老婆講，莫講係佢，就算係我，銀行都唔做按揭，我仍然有幾個單位沒有做按揭，銀行根本冇理，老實說，
如果連我都唔做，合資格買樓做按揭的人不多，這時候就要調整投資策略。
我同老婆講，銀行唔做按揭，我做五成，老婆出二千萬，我出二千萬，乜都唔好買，只是買細價樓，四千萬應該可以買到六至八個單位，幾個月之後，當銀行放水，樓價就會飆升，兩年之後熟成，才考慮賣唔賣，老婆話OK，叫我立刻過數，我話冇問題，但要切記，千祈唔好買金融產品，10釐都唔好買。
老婆話唔明白，點解我睇好樓市，而中原指數不停地跌，理論上指數沒有錯，咁即使我錯，其實，物業買賣，最關鍵就是銀行，銀行唔借錢，買樓的人一定少過賣樓的人，樓價又點會上升，但終有一日，銀行一定要放水，到時候我真的不敢想像，現在有錢不是最好食雲吞， 而是炒細價樓。
