細個時，阿嫲每個星期日都要我陪佢讀關帝經，過五關斬六將，過關斬將有威風，其實，關帝經有部份是講諸葛亮，以大夢誰先覺來讚賞孔明可以預先分析當時形勢，最後變成三國。
有老友同我講，在樓價急跌，兼大多數評論員話樓市會繼續下跌，大銀行更加表示房地產債務違約急升超過4倍
之下，恆指竟然大升，有很多沽空期指的人措手不及，輸到阿媽都唔認得，唔通中央政府降準，減息真係咁有效。
今次真係大夢誰先覺，中央降準減息是人所共知的事，如果唔降就大鑊了，我較早前在明報發表了一篇文章，題目是七個待判的少年，講及普華永道被中國政府因恆大事被罰超過4億元，其他會計師事務所知道，就算普華永道咁大件事都只是罰4億元，他們可以放心在國內繼續做審計工作，這對股市來說，是一個非常利好消息，唔知有冇人留意，冇留意的人即是繼續瞓覺。
另一個重要消息，就是香港擊敗新加坡，重返金融中心前三，紐倫港再現，雖然事前大家都收唔到分析，但如果有留意世界金融經濟，就知道全世界金融中心，英國倫敦，新加坡，法國巴黎，德國法蘭克福，瑞士蘇黎世，全部都受到美國監視甚至控制，只有香港是自由的，外資會發覺，留在原有的金融中心與去新加坡沒有分別，點解要去新加坡，香港就唔同，可以不受美國控制，而事實上全世界需要一個不受美國控制的金融中心，所以重返前三，與倫敦只是相差一分，下次評分，可能變成紐港倫，如果投資者有留意這些細節，就知道股市必升，如果瞓咗覺發緊夢就冇得講，除非是比其他人醒得快。
