老友六十大壽，收到幾份由女兒男朋友們所送的厚禮，老友問個女邊個男仔最有機會，他只會收最有機會的男仔厚禮，個女話未決定，個個都有機會，或者個個都冇機會，老友聽到之後將禮物退返哂俾所有送禮的男仔，老友心意我明白，無謂令人誤會，以為老友個女接受送禮男仔的愛，如果老友唔接受厚禮，他日如果不能談婚論嫁，老友亦不會畀人講閒話，不過，老友個女就唔開心，她認為老豆生日，冇番幾個男仔送厚禮是很冇面。
近日市民對銀行不滿，搞到金管局要解畫，call loan就冇辦法，抵押品價值下降，銀行是有權call loan追差額，唔call 是人情，call是道理，不能妖魔化call loan，大家都明白，但銀行收了客戶按揭申請，又遲遲唔肯批，這有點那
個，如果銀行認為申請人不合格，最好方法就是不接受申請，甚至在客戶未落訂已經話唔會接受申請，而現在就是銀行接受申請之後，問無數咁多問題，又要收入證明，到最後，甚至過了成交期限仍然未批，搞到個客要撻訂，在銀行方面，一定會講要顧及銀行風險以及客戶香港銀行體系安全，對不合格申請人唔會批按揭貸款，銀行是冇錯，不過，如果唔打算批，應該早啲講俾申請人知。
老友擺大壽當日，冠蓋雲集，但佢個女唔開心，因為她的男朋友們見到老友唔收禮，以為自己冇機會，連嚟都費事嚟，費事見到老友個女同其他男仔煙韌，自己眼冤，老友後來都覺得當日收咗份厚禮，寧願生日宴會之後退回，令到場面熱鬧一些。
銀行如果一早退回那些按揭申請，可能會令人誤會銀行冇生意，現在就可以話俾人知，銀行好多生意，有很多按揭申請，批都批唔切，對銀行商譽一定有所提升。
