星期一晚，在亞洲股市暴跌當日，竟然有老友擺慶功宴，不過唔係贏咗錢，而是逃過一劫，在大跌之前，早已將日股，英偉達，比特幣等股票或者投資產品套現，出席的人當然大讚特讚，老友話有苦自己知，佢唔想賣，不過是被迫的。
老友話在過去一年，所持有的物業借貸比率雖然不足五成，但仍然俾銀行call loan call到癲，本來賣走一些物業就
可以解決問題，但銀行唔放貸，有人買都搵唔到銀行借錢，在冇辦法之下唯有賣股票，港股唔捨得賣，唯有賣美股，日股，比特幣，英偉達等，想唔到竟然逃過一劫，今次真係要多謝銀行call loan。
老友問我，如果我是銀行家，會不會向按揭客戶call loan，老實說，我雖然口嘈夜嘈，叫銀行唔好向還款準時的客戶call loan，但如果我是銀行家，我一樣會向按揭客戶，尤其是有投資外股或者金融產品的客戶call loan，目的是迫那些按揭客戶賣外股以及金融產品，而事實上我自己亦因為提防銀行隨時call loan，而將手上美股，比特幣等全部賣走，如果不是銀行call loan call得咁急，我不但唔會賣走手上美股，比特幣等，可能仲會買多啲，今次真係要多謝銀行。
其實銀行做得唔夠，他們應該向那些擁有負資產的業主call loan，因為他們並不是負資產者，手上持有不少股票以及金融產品，如果銀行向他們call loan ，迫使那些人賣走部分投資產品，今日同樣會多謝銀行，但銀行唔會咁樣做，因為擁有那些負資產的人大多數是在銀行工作的，自己人就唔好玩得咁絕，反而害了他們，不過，世界就是這樣的，對別人好可能害了他們，對別人唔好可能幫了他們。
