最近去了一個物業投資者飯局，見到大家都開心，包括最近賣走手上最優質物業的投資者，我覺得很奇怪，問他們是否苦中作樂，有投資者話不是，是想通了，揸住咁多物業，雖然借貸不多，但仍然被銀行call loan call到失魂，倒不如將手上的物業盡量清倉，直至唔欠銀行錢為止，在座的投資者最少都揸住30億物業，年回報3%計算，每年有9000萬收入，點都夠一家人使，最緊要是開心，唔使應付銀行call loan。
我話咁樣唔係開心，而是心灰意冷，不過，我同意在座各位投資者睇法，盡能力將債務減到最低，不但自己開
心，同時亦令到銀行放心，而且仲會將資源投放在其他行業，對香港是利大於弊，不過，對於有關的在職人士，包括投資者的伙記，以及銀行同事，可能會出現人事變動，但這亦只是陣痛，香港政府要打擊地產投資活動，陣痛是不能避免。
很多人唔明白，在過去超過一年，銀行call loan call到失魂下，投資者的週轉亦有問題，賣樓的當然有，但唔見到有投資者清盤破產，是否逆週期措施幫了投資者，他們不明白，的而且確，逆週期措施是有幫助，不過，就算冇逆週期措施，投資者都會奉行金字塔的投資方法，就是持有愈多物業，借貸愈少，如果只得一個自用物業，借九成都冇問題，但持有10億以上物業，借貸比率唔會超過30%，所以，即使銀行call loan，租金在疫情下收入減少，但大部分投資者都可以捱得住，現在投資者心灰意冷，真係意料之外。
